Þjónustan og safnið: Safnkostur

Bókasafn og upplýsingaþjónusta Háskólans í Reykjavík er sérfræðisafn á fræðasviðum háskólans. Safnkosti bókasafnsins er einkum ætlað að mæta þörfum HR vegna kennslu og náms og þeirra sem stunda rannsóknir við skólann. Safnkosturinn er að mestu leiti rafrænn og leitarbær inn á leitir.is, en til að takmarka leitina við efni HR er hægt að nota slóðina hr.leitir.is. 

Bókasafnið á um 18.000 titla á prenti og er með áskrift að um 230.000 rafbókum. Einnig veitir bókasafnið aðgang að um 20.000 fræða- og vísindatímaritum í rafrænni áskrift og fjölmörgum gagnasöfnum. Háskólinn í Reykjavík er þátttakandi í verkefni um Landsaðgang að rafrænum gagnasöfnum og tímaritum (hvar.is).

Bókum er raðað í hillur samkvæmt flokkunarkerfi Deweys (The Dewey Decimal Classification System (DDC)). Sérhver bók fær raðtákn sem segir til um hillustaðsetningu bókarinnar.

Dæmi: Bókin Um lög og lögfræði eftir Sigurð Líndal frá árinu 2003 fær raðtáknið (hillustaðsetninguna) 340 Sig 2003.

Helstu flokkar eru:

Við innkaup fyrir safnið er tekið mið af þörfum notenda Háskólans í Reykjavík og er stefnan að safnkosturinn sé að stærstum hluta rafrænn. Við uppbyggingu safnkosts er tekið mið af þörfum notenda HR og lögð áhersla á gæðaefni. 

Innkaupa- og áskriftastefna bókasafnsins

Bækur – á prenti og rafrænar:

• Aðeins eru keyptar bækur sem eru á fræðasviðum sem kennd eru í HR.
• Allar bækur eru keyptar rafrænar sé þess kostur á. Undantekningin er:
  • Ef bókin er ófáanleg rafræn í kerfi sem talar við Ölmu, bókasafnskerfi HR.
  • Ef rafbókin er dýrari en 40.000 kr. og prentaða eintakið 50% ódýrara.
• Aðeins eru keyptar bækur á íslensku eða ensku.
• Aðeins eru keyptar rafbækur með einum samtímanotanda nema í tilfellum þar sem það er óverulegur verðmunur á fleiri notendum (sjaldgæft).
• Ávallt er keypt nýjasta útgáfan af bókum.

Gagnasöfn og rafrænar áskriftir:

• Bókasafnið greiðir ekki fyrir einstakar áskriftir að tímaritum fyrir starfsmenn.
• Bókasafnið greiðir fyrir áskriftir að efnisveitum að heimildum sem nýtast við nám í Háskólanum í Reykjavík.

Ferlið við að óska eftir nýrri áskrift (fyrir starfsmenn HR):

• Kennari hefur samband við forstöðukonu bókasafns sem fer og athugar með verð á áskrift fyrir bókasafnið.
• Kennari fer með erindi inn á deildarfund til umræðu og deildarforseti ákveður hvort senda eigi bókasafni beiðni fyrir nýrri áskrift.
• Áskriftir bókasafnsins eru endurskoðaðar árlega í september. Best er ef beiðnir um nýjar áskriftir berast að vori til, svo nægur tími sé til að fá verðtilboð og prufuaðgang áður en fjárhagsætlun bókasafnsins er gerð í október fyrir næsta ár.
• Athugið að ekki er sjálfgefið að hægt verði að vera við beiðninni.

Endurskoðað síðast janúar 2024

Bókasafnið tekur við öllum gjöfum sem styrkja safnkostinn og samræmast áætlun um uppbyggingu hans.

Almennt áskilur bókasafnið sér rétt til að fara með gjafarit sem sína eign og ráðstafa þeim að vild, t.d. gefa öðrum eða henda ritum sem safnið telur sér ekki hag í að eiga. 

Sömu reglur gilda um gjafarit og annað efni hvað varðar grisjun, m.a. með tilliti til ástands og aldurs. 

Við mat á bókagjöfum ber einkum að hafa eftirfarandi í huga:

1. Styrkir gjöfin safnkost bókasafnsins með tilliti til fræðastarfs og rannsókna við HR?
2. Samræmist gjöfin innkaupastefnu bókasafnsins?
3. Hvaða kostnaður hlýst af því að taka við gjöfinni og gera hana sýnilega/aðgengilega ?
4. Hvert er ástand gjafarinnar. Eru bækurnar slitnar eða skítugar? Er um eldri útgáfur að ræða?